أقم_جبلا_لعرفات_في_قلبك وارجم_الشيطان_كل_لحظة_في_حياتك فالحج_ليس_للحجاج_فقط

السلام عليكم ورحمة الله وبركاته 

قبل ما نكمل... النبي قال وهو راجع من غزوة تبوك: "إن بالمدينة أقواماً ما سرتم مسيراً، ولا قطعتم وادياً إلا كانوا معكم" يعني قاعدين في بيوتهم ومع ذلك بيتسجل لهم أجر كأجر المجاهدين في سبيل الله، فتعجب الصحابة وقالوا: "يا رسول الله! وهم بالمدينة!؟" قال: "وهم بالمدينة.. حبسهم العذر"...

يعني إنت ممكن تتمنى الحج بصدق من قلبك وما تطولوش، بس تطول ثوابه وإنت قاعد ف بيتك وكإنك كنت هناك.. طب إزاي؟؟؟؟ ربنا جعل لغير الحاج أعمال تشبه أعمال الحجاج وفي نفس موسم الحج كمان عشان الأمة كلها تبقى ف نفس التوجه الإيماني بغض النظر مين في مكة ومين في بيته،  وقال للأمة كلها "فمن جاهد فإنما يجاهد لنفسه" و قال كمان عز وجل "وليعلمن الله الذين صدقوا وليعلمن الكاذبين".. 

وكلنا عارفين الحديث: "ما من أيام العمل الصالح فيهن أحب إلى الله عز وجل من هذه الأيام -يقصد االعشر من ذي الحجة- قالوا: يا رسول الله! ولا الجهاد في سبيل الله؟! –خدتوا بالكو من السؤال! أصل الجهاد كان عند الصحابة أعلى شيئ - قال: ولا الجهاد في سبيل الله".. يا الله!.... ثم استثنى صلى الله عليه وسلم فقال: "إلا رجل خرج بنفسه وماله، ثم لم يرجع بشيء من ذلك"-يعني ساعتها يبقى الجهاد أفضل من العمل الصالح في أعظم 10 أيام في السنة   .. معقولة في شيئ أعظم من الجهاد!..

>>>يبقى الموضوع مش بسيط، ولاهيبقى 100 استغفار وركعتين نافلة ودمتم مثلا.. لاااااا، لازم ما تضيعبش دقيقة واحدة عشان تبقى مشارك بأعظم قدر من أعمال الحجاج وإنت ف مكانك.. والأجر على قدرالمشقة.. 

طب ندخل بقا على أمثلة للطاعات اللي ممكن نعملها دي

هاتي ورقتك وقلمك واكتبي، عشان من بكرة =أول يوم في العشر- تكوني جاهزة إن شاء الله:

1-صيام ال9 أيام الأولى إللي من ضمنهم التاسع إللي هو وقفة عرفة...----طب العاشر لأ ليه؟=عشان دة أول يوم العيد الصيام فيه حرام..طب مش هقدر أصوم التسعة ورا بعض كدة=خلاص صومي يوم ويوم، المهم يوم عرفة يبقى ضمن الصيام... طب برضو صعب؟ = يبقى على الأقل إوعي تسيبي صيام يوم عرفة: صيامه حبيبتي هيكفر لك ذنوب سنيتن من عمرك بالتمام والكمال: سنة فاتت وسنة لسة جاية إنتي ما عندكيش فكرة سيئاتك فيها هتكون إيه .. تخيلي !!.. ==مش بيفكرك دة بمغفرة كل ذنوب الحجاج ؟ <3 .. مش بقولك الحج ليس للحجاج فقط. وأكثر ما يعتق الله من الرقاب يعتقها في يوم عرفة، قال الرسول صلى الله عليه وسلم: "ما من يوم أكثر من أن يعتق الله فيه عبداً من النار من يوم عرفة"..  =*فالحاج يكفر الله ذنوبه في عرفة، وغير الحجاج الصائمون في يوم عرفة يكفر الله ذنوبهم وهم في بلادهم على بعد مئات أو آلاف الأميال عن مكة*، فقط يجتهد كالحجاج قدر طاقته.. وربك كريم <3 ..

2-صلاة الجماعة للرجال في المسجد، والصلاة على وقتها للنساء في البيت...

**وطبعا دة واجب طول السنة، لكن لو حد مفرط فيه طول السنة، يبقى يستغل الموسم الكريم دة اللي كل الناس فيه بترجع لربنا، ويستغل الهمم العالية والنفحات الطيبة ويرجع يتمرن تاني.. وطبعا من أهم الصلوات اللي فرصة إن الواحد يجاهد نفسه في عدم التفريط فيها ولو زحفا على وجهه: "صلاة الفجر" .. كفاية إن ركعتين السنة بتاعتها أحسن من كل الدنيا وإللي فيها زي ما الحديث بيقول، أومال بقا الفريضة بتاعة الفجر شخصيا بتعمل إيه في القلوب وبتعدل ميزان حياتنا بآني درجة؟ لو نفسك مش مساعداك وشيطانك غلاب، اسمع  درس "كيف تحافظ على صلاة الفجر" للسرجاني..

**طب إيه وجه الشبه بين النقطة دي ومناسك الحج؟=مش النبي بيقول: "من غدا إلى المسجد أو راح أعد الله له في الجنة نزلاً كلما غدا أو راح"؟، و بيقول في الحج كمان: "الحج المبرور ليس له ثواب إلا الجنة" .. ياللي بتغبط الحجاج على الجنة تقدر تلحقهم ع الجنة بأمر الله وإنت ف بيتك <3

3- الإكثار من صلوات النوافل...

**سواء السنن الرواتب أو الضحى أو القيام  والوتر أو سنة الوضوء، وصلاة الحاجة، وصلاة الاستخارة، وصلاة التوبة..إلخ.. *صلِّ صلوات لله تطوعاً، صلِّ عن الصلوات التي فاتتك في عمرك، واجعل هذه الأيام العشر هجرة كاملة إلى الله عز وجل*.. وزي ما النافلة في البيت الحرام بمائة ألف حسنة= النافلة وإنت ف بلدك في العشر الأوائل ب700 ضعف، كما قال ابن عباس(هامش1)

4-الذكر...

>>>ذكر الله في العشر أيام دول ليهم وضع خاص جداااا الحقيقة.. جه تنبيه عليه بشكل دقيق جدا في آيات زي: "وَاذْكُرُوا اللَّهَ فِي أَيَّامٍ مَعْدُودَاتٍ"، وكمان "وَيَذْكُرُوا اسْمَ اللَّهِ فِي أَيَّامٍ مَعْلُومَاتٍ".. وفي الحديث كمان: "أيام أكل وشرب و ذكر لله تعالى".. الغافل هو من لا ينتبه لكل هذا الكم من التنبيهات، فلا تكن من الغافلين.. وفي الحديث: "سبق المفردون، قالوا: وما المفردون يا رسول الله؟! قال: الذاكرون الله كثيراً والذاكرات"...  

>>>وأنواع الذكر كتير: سبحان الله، الحمد لله، الله أكبر، لا إله إلا الله، سبحان الله وبحمده، سبحان الله العظيم، لا حول ولا قوة إلا بالله أستغفر الله...إلخ، المهم يكون "ذكرا كثيييرا"، أصل ربنا لما طلب مننا نذكُره عز وجل قال "كثيرا: "وَالذَّاكِرِينَ اللَّهَ كَثِيرًا وَالذَّاكِرَاتِ"، وكمان: "وَاذْكُرُوا اللَّهَ كَثِيرًا لَعَلَّكُمْ تُفْلِحُونَ".. 

>>>هنقسم الذكر بقا إلى4 فروع: أذكار مخصوصة، استغفار، دعاء، القرآن..

==الأول: أذكار مخصوصة==في أيام العشر فيه أنواع معينة من الذكر يستحسن تكتروا منها، زيً: التهليل -يعني لا إله إلا الله- والتكبير، والتحميد، عشان النبي قال صلى الله عليه وسلم: "ما من أيام أعظم عند الله سبحانه ولا أحب إليه العمل فيهن من هذه الأيام العشر فأكثروا فيهن من التهليل والتكبير والتحميد".. بالذاااات التكبير له قيمة كبيرة جداً في الأيام دي، جت في القرآن مخصوصة: "ولتكبروا الله على ما هداكم".. يعني طول ماحنا في البيت أوفي العربية أو في الشارع نكبَّر ونخلي ولادنا يكبّروا.. <3

==التاني: الاستغفار== الواحد بيحس كدة في موسم الحج سواء حاج أو قاعد في بيته، بإن الجو العام جو مغفرة وعفو ورحمة وتوبة...الحديث: "الحجاج والعمار وفد الله إن دعوه أجابهم وإن استغفروه غفر لهم"..  ----طب وإحنا؟ مش إحنا بنغبط الحجاج على موضوع المغفرالتامة دة؟ طب مانتي تقدري حبيبتي تصحي من نومك وقت السحر وتقعدي تستغفري وقت النزول الإلهي العظيم للسماء الدنيا؟ طب مانتي تقدري حبيبتي تقولي سبحان الله وبحمده مائة مرة فتتغفرلك كل ذنوبك حتى لو كانت أد زبد البحر الأبيض دة؟ طب مانتي تقدري تواظبي على أذكارالصباح والمساء وفيها الاستغفار الأكبر اللي النبي سماه "سيد الاستغفار"!.. مش بقولكم: الحج مش للحجاج فقط.. فيه بدائل ربنا إداها للي مش قادر يحج، بس فين القلوب؟ .. #عرفتَ_فالزَم

==التالت: الدعاء== وما أعظمه من باب!.. ففي الحديث: "الدعاء هو العبادة"!.. طب مش الحجاج عندهم فرص لإجابة دعوات في مكة لا ترد؟ زي الدعاء *في الطواف، وفي الركن اليماني، وفي السعي بين الصفا والمروة، ويوم عرفة، وعند الشرب من زمزم، وعند رمي الجمرات وبعد رمي الجمرات*...إلخ، فربنا برضو ما حرمناش من دة وإحنا  بعيد عن مكة.. عندك مواطن إجابة الدعاء كتير جدا، أوقات إجابة الدعاء=زي الثلث الأخير من الليل وعند الفطر.. طب أماكن لإجابة الدعاء= زي عند المريض، و عند السجود "أقرب ما يكون العبد من ربه وهو ساجد فأكثروا الدعاء".. الدعاء في أيام العشر أكثر قبولا من غيرها، فلا تفوتوا الموسم، فالحج ليس للحجاج فقط. (هامش2فيه مواطن إجابة الدعاء كلها)

==الرابع: قراءة القرآن== موطن السعادة الكبرى <3 .. ولو مسكنا فقط باب "سعادة الثواب بالحسنات" وحسبناها بالورقة والقلم، هيحصل لنا ذهول تاااام.. عارفة لو ختمتي القرآن في ال9 أيام دي –عشان لو شلنا يوم العيد- هتاخدي كام حسنة!!؟--- هل دة صعب؟ أيوة طبعا صعب إنتي بتهزري ، أنا معاكي إنه صعب بس هو مش مستحيل، "ولذكر الله أكبر"  <3 ---- صعب عشان الوقت والجهد؟= مش إنتي كان نفسك تحجي مانتي لو كنتي حجيتي كنتي هتفرغي نفسك أسبوعين وهتتعبي جداااا كمان.. طب ما تفرغي نفسك ساعتين فقط لمدة 9 أيام عشان تختمي 30 جزء؟ وتعالي نحسب بقا: الحرف بعشر حسنات –ودة الحد الأدنى لإن ربنا عموما بيضاعف الأجر لمن يشاء لسبعمائة ضعف كما في آية السنابل في البقرة- بس هنقول 10 حسنات فقط مجازا، نضرب في 700 بقا عشان الأيام المباركة دي الثواب فيها لوحده مضاعف لـ700=يبقى معانا 7000وحدة جاهزين قبل ما نبدأ آهو، طب القرآن فيه 321000 حرف= يبقى اضربي 7000وحدة في الرقم العشرومية دة= هيطلعلك: ألفين متين وخمسين مليون حسنة تقريبيا :/ كل دة وأنا ما رحتش مكة!.. #إلا_كانوا_معكم #حبسهم_العذر ...

5-الوحدة بين المسلمين= يعني الحجاج رايحين يتعرفوا على مسلمين من كل أنحاء الكوكب، إنت كمان عندك فرصة تقوي روابط الوحدة بين المسلمين في بلدك، ودة غرض رئيسي من أغراض الحج "الشعور بالأمة الواحدة"، وصعب إن يكون الإحساس دة موجود والخلافات والشقاق لسة مستمر بيننا وبين بعض على مستوى اليبت أو المسجد أو الأقارب والصحاب...إلخ وسع الدايرة أكتر وأكتر وفتش كدة.. خلي الأيام المباركة دي فرصة توحد فيها المسلمين في الدائرة اللي تقدر عليها –قدر طاقتك- 

وتعالى هرتبها لفروع:

-------الأول بر الوالدين------*فمهما كان بينك وبينهم اختلاف في الرأي أو وجهات النظر، فالأم والأب يُقدَّمان على كل شيء إلا أن يأمراك بمعصية= فهنا لا طاعة لمخلوق في معصية الخالق*..وماتنساش إنك قبل ما تحج بتتحلل من الحقوق والقطيعة عشان يقبل حجك وتدخل الجنة ، صح؟ كذلك تقدر تعمل دة وإنت مش ف مكة: برك لوالديك يوجب لك الجنة. #افجتهد .. ففي الحديث: "رغم أنف، ثم رغم أنف، ثم رغم أنف" -يلعن رسول الله صلى الله عليه وسلم رجلاً فعل فعلا شنيعا فما هو هذا الفعل الشنيع؟ يقول: "من أدرك أبويه عند الكبر أحدهما أو كلاهما فلم يدخل الجنة" ..

-------التاني صلة الرحم------في الحديث يخاطب الله عز وجل الرحم فيقول: "أما ترضين أن أصل من وصلك وأقطع من قطعك؟"!!!..  مين نفسه ربنا يوصله؟؟--- يصل رحمه ببساطة <3 .. حتى لو قاطعوني؟! أيوة طبعا، ماهو أصل اللي عاوز ربنا يوصله لازم يضحي مهما شاف من مرار .. والحديث واضح في كدة: "ليس الواصل بالمكافئ، ولكن الواصل الذي إذا قطعت رحمه وصلها"... دة غير الحديث التاني اللي بيحكي فيه للنبي رجل  يصل رحمه فيقطعونه ويسيئون إليه، النبي قال له استمر ولك الأجر وهم مخذولون..

-------التالت الأصحاب والمعارف والجيران------ فرصة ننشر المحبة والود في الأيام دي ونستشعر نفحات الحج المليان ة ود وألفة وتعارف، وليك الجنة زي الحجاج إن شاء الله والله، ففي الحديث: "من عاد مريضاً أو زار أخاً له في الله ناداه مناد بأن طبت وطاب ممشاك وتبوأت من الجنة منزلاً"... #إشاعة_الحب_في_الله_بلا_مصالح_جزاؤه_الجنة

-------الرابع إصلاح ذات البين------فتش في علاقاتك كلها، وشوف فين مواطن النزاع والخلاف والشقاق والهجر، وحاول تكون إنت حلَّال العُقد والمشاكل، وحاول تسامح وتفتح صفحة جديدة وتبتسم ابتسامة العفو عند المقدرة، *ففرصة في هذه الأيام الكريمة أن تذكر أن الله يغفر الذنوب للمتصالحين، ويؤجل المغفرة لمن بينهما شقاق حتى يصطلحا، وهذا كلام في منتهى الخطورة: "تفتح أبواب الجنة يوم الإثنين ويوم الخميس، فيغفر لكل عبد لا يشرك بالله شيئاً إلا...؟؟؟؟؟؟" –شوف النبي استثنى مين!- "إلا رجلاً كانت بينه وبين أخيه شحناء، فيقال: انظروا هذين حتى يصطلحا" .. #مش_رفاهية_يعني.. #إنتي_مزنوقة_شوفيلك_حل #اتصرفي-_-

6-الصدقات== دي أيام سعادة وبهجة، وفقراء المسلمين في أشد الحاجة للسعادة حاليا وكل حين، فابسط إيدك بالنفقة تسعَد وتسعِد غيرك.. "وَمَا تُنفِقُوا مِنْ خَيْرٍ فَلِأَنفُسِكُمْ وَمَا تُنفِقُونَ إِلَّا ابْتِغَاءَ وَجْهِ اللَّهِ وَمَا تُنفِقُوا مِنْ خَيْرٍ يُوَفَّ إِلَيْكُمْ وَأَنْتُمْ لا تُظْلَمُونَ".. إنفاقك في الأيام دي مضاعف زي ماهو مضاعف للحاج #ركزي.. ففي الحديث: "النفقة في الحج كالنفقة في سبيل الله، الدرهم بسبعمائة درهم"، أجر مهووول، وأنتي عندك نفس الفرصة وإنتي ف بيتك: الدرهم بسبعمائة درهم، والجنيه بسبعمائة جنيه، والألف جنيه بسبعمائة ألف جنيه في سبيل الله، الحجاج بيصرفوا آلاف مؤلفة قربى إلى الله= طب ما تتنافسي معاهم في نفس الموسم المبارك وتاخدي زي أجرهم بالنية؟ وعلى أد ما تقدري: "فاتقوا النار ولو بشق تمرة".. 

7-التقشف==تعالوا نعيش في الأيام دي عيشة الحجاج البسيطة من غير تكلفة، مش مهم نوع الأكل أو اللبس  أو النومة، هنعيش بالكفاف في الأيام دي، وآهو بالمرة نتمرن على الخشونة ونحس بإحساس الناس الخفيفة دي إللي الدنيا مش ف قلبها وتقدر تستغنى عن أمور رفاهية فيها ف أي لحظة بسهولة لله.. وسبحان الله، النبي بيلفت نظرك دايما عشان يخليك تتشابه في حالك كتير جدا مع الحجاج وبرضو تعيش طقوس من الجو بتاعهم من غير ما تروح الحج.. #أكيد_دة_مش_صدفة.. عندك مثلا حديث: "إذا دخلت العشر -الأيام العشرة الأولى من ذي الحجة- وأراد أحدكم أن يضحي فلا يمس من شعره وبشره شيئاً".. وفي رواية تانية: "فلا يأخذن شعراً ولا يقلم ظفراً"، يعني تكون زيك زي المحرم في هيئته وشكله، لا تحلق الشعر ولا تقلم ضوافرك ولا تحط عطر....  زي الحجاج تماماً لحد ما تضحي في يوم العيد، سبحان الله! مش قلت لكم: الحج ليس للحجاج فقط.. وهنتكلم عن الأضحية أكتر في رقم8..

وأخيرا: 8- الأضحية== *من أعظم القربات إلى الله عز وجل، وتجعلك تعيش تماماً في جو الحج والهدي والذبح، ويكفي أن أذكر لكم حديثين* الحديث الأول: "ما عمل ابن آدم يوم النحر عملاً أحب إلى الله تعالى من هراقة دم، وإنه ليأتي يوم القيامة بقرونها وأظلافها وأشعارها، وإن الدم ليقع من الله عز وجل بمكان قبل أن يقع على الأرض، فطِيبوا بها نفساً" #فطيبوا_بها_نفسا .. الله <3 ... ، تأملي كدة مدى روعة الحدث الجلل و*التسجيل الرائع لحسناتك يوم العيد وإنتي بتقلدي الحجاج بذبح أضحيتك وإنتي في بلدك*... الحديث الثاني: "قال أصحاب رسول الله: يا رسول الله! ما هذه الأضاحي؟" يسألون عن أضحيات يوم العيد، قال: "سنة أبيكم إبراهيم"، قالوا: "فما لنا فيها يا رسول الله؟!" –يعني ما هو الأجروالفضل والثواب؟- قال: "بكل شعرة حسنة"، قالوا: "فالصوف يا رسول الله"؟! قال: "بكل عشرة من الصوف حسنة"... وأسيبكم بقا تعدوا الشعر اللي في فروة الخروف عشان تعرفوا قدر الثواب في حالة إنكو قدرتوا تدبحوا.

===========================

نراجعهم بسرعة بقا، ونعمل لهم ورد محاسبة، ونحاول نطبقهم بتركيز بإذن الله، اعملي جدول 10 أيام وحاولي تأخدي الدرجة النهائية في الأيام العظيمة دي، 8واجبات في 10 أيام، وحاسبوا أنفسكم قبل أن تحاسبوا:

1-صيام التسع الأوائل من ذي الحجة، وبالذات يوم عرفة.، 2-صلاة الجماعة في المسجد للرجال، وبالذات صلاة الفجر، والصلاة على أول وقتها للنساء.، 3-الإكثار من صلاة النافلة كقيام الليل والنوافل القبلية والبعدية، وصلاة الضحى وغيرهم، 4-الذكر بفروعه الأربعة: أذكار مخصوصة واستغفار ودعاء وختمة قرآن، 5-زيادة روابط الوحدة الإسلامية بفروعها الأربعة: بر الوالدين، وصلة الرحم، والزيارة في الله، وإصلاح ذات البين، 6-الصدقة والإنفاق في سبيل الله على الفقراء، ولا تنسوا إخوانكم المستصعفين، 7-التقشف وعدم الأخذ من الشعر أو الأظافر إن كنت ستذبح في العيد. 8-الذبح، ولك بكل شعرة حسنة إن شاء الله، دة لو كنت قادر على الذبح في العيد.

*ليقم كل منا جبلاً لعرفات في قلبه، وليرجم كل منا الشيطان في كل لحظة من لحظات حياته، وليتخفف كل منا من دنياه، فما بقي من الدنيا أقل بكثير مما ذهب، ليصلح كل منا ذات بينه وليغفر لإخوانه، وليحب الخير لكل المسلمين في مشارق الأرض ومغاربها* فالحج ليس للحجاج فقط..

منقول