السيف المكسور - شعر بالعامية المصرية

( السيف المكسور )

في طريق ممدود والغاز يرسم للعتمه سدود

وصوت الاحجار اقوي من الـتار

في ايد الثوار تكتب بالنار

اسامي الشهدا المرصوده



احجار باردة ملهاش فايده

في طريق مليان بازاز مكسور

وركام منثور

وبواقي عضام لقتيل مجرور

كان اسمه سلام



واشباح الليل بتناجي الويل

لجل الاطفال متشد الحيل

اطفال ثوار شبه البنور يضوي في ضلمه



وشباب شايبه

ورجال مـ الهم بقت نايبة

وحريم بتنادي علي ديابة مهيش هايبة

واشباه الناس تتفرج في محطات خايبة

علي اخر ناس بتموت شايبة



ابليس مكار والخطة في ايده بألف قرار

وصوت الثوار

يهتف بالتار

ويرج سدود



وعبيد لجنيه وعبيد لدولار وعبيد احرار

ايون احرار !..

بس في عتمة قلب طريق بيغير معني الحر

لجل الاعلام ميكون حر !.



لجل التوعية النوعية الفكرية الثقافية السياسية

لجل التنويع علي اوزان الملوخية

والعنجهية العسكرية

بتسوق الكل



في طريق ممدود والشمس بترسم للفكره حدود

وصوت الأحجار تحت الأشجار موجود

والايد في الايد والصوت مردود

والصدي بيرج وجود



وعلي الجنبين اطلال الماضي المهدوده

ورمح وسيف وبواقي عضام مسنوده

تكتب بالدم نهاية مشهودة

لعبيد الامس واموت اليوم واشباح الغد الموجوده



وفي ايدي السيف المكسور

راشق في الارض

يرسم بالدم المهدور

خيط من برد

يملي جسمي المحموم

فانزل علي الارض

رمل اسود وركام

وجمر لاح وسط حطام

ودمعة محبوسة في عيني بتكسر كل الالوان



بس الاحجار

تحت الاشجار

بتقول انه مرفوع الراس

خطوته جوه الضلمه تدب

تهابه الحراس وتهرب منه في جب

لأن سلاحه الحب !..



واقف زنهار

وسط الاحرار

تحت الاشجار

وفي ايده نبوت !..



راكب عـ الخيل

واشباح الويل

بتناجي الليل

في طريق مفقود



وشيطان مغرور بترن الضحكة في صوته تهد سدود



وسلاح من نار مسبوك في نحاس

راشق بسهام في قلوب الناس

ودموع العين مهترجع حقوق الناس

ولا تداوي مصاب في الراس

بغاز ورصاص

من مصر لقدس المنداس

تحت ايدين النخاس

بسياسة سوق



والسوق مفروش ملتقيات ..

منتديات ..

مؤتمرات ..

نسمع حكايات

تقلب حوارات

وكمان روايات

والسريك كبييييييير

مليان فقرات

تتعاد بالكوم !..



يا صرخة طفل جوانا ترج الكون

تملي صدورنا سموم ..

يا حزن يقلب فرحنا هموم

يا نار تشعل غضبنا سنين كما البركان ..

يا عار خيم كما السرطان

قلب الوطن مسجون !..